ភ្នំពេញ៖ បន្ទាប់ពីធ្វើដំណើរទស្សនកិច្ចរាប់ម៉ឺនគីឡូកាលពីសប្ដាហ៍មុន នាយករដ្ឋមន្ត្រី សម្ដេចតេជោ ហ៊ុន សែន បានបន្តកិច្ចការជាបន្តបន្ទាប់រហូតមកដល់ថ្ងៃព្រហស្បតិ៍នេះស្ទើរតែគ្មានថ្ងៃសម្រាក។
ជាក់ស្ដែងនៅថ្ងៃព្រហស្បតិ៍នេះ កាលពីពេលព្រឹកសម្ដេចតេជោ ហ៊ុន សែន បានចូលរួមបើកសន្និសីទ «ចក្ខុវិស័យកម្ពុជាឆ្នាំ២០២២» ខណៈដែលល្ងាចនេះសម្ដេចតេជោក៏បានចូលរួមប្រជុំតាមអនឡាញជាមួយបណ្ដាគណបក្សនយោបាយនៃប្រទេសនានាថែមទៀតផង។
សម្ដេចតេជោបានសរសេរនៅលើហ្វេសបុកផេករបស់សម្ដេចនៅល្ងាចនេះថា៖ «ពេលព្រឹកប្រជុំផ្ទាល់ក្នុងប្រទេសអំពីសេដ្ឋកិច្ច សង្គមនៅកម្ពុជា។ ពេលល្ងាចប្រជុំតាមអនឡាញជាមួយបណ្តាបក្សនយោបាយនៃប្រទេសនានាអំពី (គោលនយោបាយបរិស្ថាននិងការអភិវឌ្ឍប្រកបដោយចីរភាព) ដែលបង្ហាញពីការចូលរួមរបស់កម្ពុជាលើបញ្ហាការប្រែប្រួលអាកាសធាតុ»។
គួរឱ្យដឹងផងដែរ កាលពីថ្ងៃទី២៨ ខែកញ្ញា នាយករដ្ឋមន្ត្រី សម្ដេចតេជោ ហ៊ុន សែន ទើបបានបញ្ចប់ទស្សនកិច្ចរាប់ម៉ឺនគីឡូនៅទ្វីបចំនួន ៣ដោយជោគជ័យ។
រដ្ឋមន្ត្រីប្រតិភូអមនាយករដ្ឋមន្ត្រី លោក កៅ គឹមហួន ដែលអមដំណើរសម្ដេចតេជោឱ្យអ្នកសារព័ត៌មានដឹងបន្ទាប់ពីទស្សកិច្ចនេះថា៖ «ខ្ញុំអមដំណើរជាមួយសម្ដេចនាយករដ្ឋមន្ត្រី ខ្ញុំមិនដែលឃើញសម្ដេចនឿយហត់ ឬមួយក៏បញ្ជាក់ពីចំណុចខ្សោយរបស់សម្ដេច គឺអត់មានទេ! សម្ដេចពោរពេញដោយថាមពល ពោរពេញដោយការចងចាំ ពោរពេញដោយភាពឈ្លាសវៃ»៕
